advertisement

:: الحلقة السادسة عشرة:

"يوم إمتحان السلوكية!"
 

كوب من النسكافيه..

كوبين من النسكافيه..

ثلاثة أكواب من النسكافيه..

هذا هو مجموع ما شربه "فنكش" ليبقى مستيقظا..

كان واقفا مع "عمرو الروش" و "عبده الحريت" و صديقة الأخير "سلمى".. وكانت يده اليمنى تمسك بكوب رابع من النسكافيه يمنعه شربها عن السقوط على الأرض مغشيا عليه, لقد سهر طوال ليلة الأمس ليستعد لإمتحان "السلوكية".. وها هم أولاء: انتهوا من الامتحان..

- "امتحان زفت.. زفت .. زفت .. زفت"

هكذا صاح "الروش" بغضب, وضرب الأرض بقدميه كالأطفال متابعا:

- "حتى ورق التلخيص اللي سهرت أقراه.. ما جاش منه حاجة تقريبا.."

ضحك "الحريت" بسخرية قبل أن يقول:

- "تقصد الورقتين اللي شهيرة اعطتهوملك؟؟؟"

وربت على كتفه في شفقة مصطنعة وساخرة:

- "دي بتشتغلك يا بني.."
- "مادة زي السلوكية كتاب 500 صفحة .. يتلخصوا في ورقتين ازاي؟؟"

وأنهى كلامه بالضربة القاضية:

- "وعموما انا قعدت اتحايل عليك علشان تيجي أشرحلك.. انت اللي حمار.. وشلة البنات ضحكة عليك"

تمتم "عمرو" بكلمات غاضبة, بينما استمرت ضحكات "الحريت" قبل أن تسأل "سلمى" صديقنا "فنكش":

- "عملت ايه يا شادي؟؟؟"

لم يكن "فنكش" يرتاح لوجوده مع الشلة أثناء تواجد "سلمى", لكنه أجابها على أية حال:

- "الحمد لله تمام, فيه شباب ساعدوني في مذاكرة المادة.. والحمد لله فهمت على ايديهم أخيرا.. وجاوبت"

وارتسمت ابتسامة على وجهه نصف الناعس وهو يقول لعبده:

- "تخيل اني احل السلوكية كويس؟؟؟ والله انا مش مصدق نفسي.."

صاح "الروش" - وقد عاد لمود المزاح مجددا- :

- "خلاص يا عم.. بدال سر الاخوة باتع كده.. ابقى خدني اذاكر معاكم للمادة الجاية"

رفع "فنكش" حاجبا وخفضه قبل أن يقول في أسف:

- "للأسف مش هاينفع.. متهيألي قفشت مع واحد منهم"

بدت علامات التعجب عليهم جميعا, لذلك فقد قص عليهم ما حدث باختصار..

ضحك "عبده" ضحكته الساخرة المعتادة قبل أن يقول:

- " أحادية الرأي.. وعدم تقبل الرأي الآخر بسهولة.. انغلاق على الذات"

ورفع سبابته مضيفا:

- "تساوي: تخلف"

لوح "فنكش" بيده قائلا:

- "بلاش نستخدم الكلمة دي.. هما ناس محترمين جدا ومتميزين جدا.."
- "ومفيش مشكلة لما يكون فيهم عيب معين.. كلنا فينا عيوب"

وداعب خصلة في شعره مفكرا قبل أن يضيف:

- "أعتقد اني هاعدي كام يوم وبعدين اتكلم مع مرعي تاني.. أحاول أفهمه مسألة تقبل الرأي الآخر"
- "أكيد ده واجب عليا.."

لا أدري ما الذي دفع "سلمى" لهذا السؤال السريع:

- "وانت رأيك ايه يا روش؟؟"

انطلقت من "عمرو" شبة ضحكة ساخرة بمعنى - رأيي؟؟؟- , ثم رسم على وجهة تعبيرا زائفا للجدية قبل أن يقول وهو يحاول كتم ضحكاته:

- "والله يا لولو أنا مش عارف.."
- "أنا بقول نبعد عن الشر ونغنيله.."

لكمه "فنكش" في كتفه قائلا ومبتسما في الآن ذاته:
- "شر ايه يا متخلف.. مش كنت لسه عايز تروح تذاكر معايا عند مرعي؟؟؟"

لم يكد "فنكش" ينهى كلماته حتى ارتفع رنين هاتف "عبده", التقط الأخير المكالمة قائلا:

- "الو.."
- "أهلا أهلا.."

وارتسمت على وجهه علامات الإنصات
- "مفيش مشكلة.."
- "خلاص أوك.."
- "ساعة واحدة بس يا فندم.."

وانهى المكالمة:
- "باي"

ضغط زر الإنهاء, وامسك بيد "سلمى" - كعلامة على أن تستعد للمغادرة- وقال للشباب:

- "هاضطر أمشي.. قناة الحلم عايزة تسجل معايا انا وسلمى تاني.. كلموني من كام يوم, وبيتصلوا عليا دلوقتي علشان يأكدوا على موعد لتحضير التصوير"

اشار "فنكش" لهما أن: "مع السلامة".. لكن "الروش" - والتي ربما قد اصابته الغيرة لأن القناة لم تتصل به لتحدد موعد آخر لتسجيل جديد- قال:

- "مش انت كنت بتقول انها قناة متخلفة؟؟؟"

مط "عبده" شفتيه مجيبا بسرعة:

- "ده قبل ما اقابل الكاست بتاعهم.. واسجل المره اللي فاتت"
- " لكن اتضحوا ناس بروفيشنال جدا.. وهايفيدوني جدا جدا"

سأل "عمرو":
- "ازاي بقى يا حدق؟؟؟"

جذب "عبده" كف "سلمى" مبتعدا, وقال دون أن ينظر للخلف:
- "هابقى اقولك بعدين.. مش عايزين نتأخر على الموعد"

* * *

كان "فنكش" و "الروش" في طريقهما للخروج عند أقبل أحد أصدقائهما قائلا:

- "انت قافل موبايلك يا فنكش؟؟؟"

ضرب "فنكش" جبهته براحته واطلق صفير قصير - كعلامة على المفاجأة- قبل أن يقول:

- "تصور, قفلته في اللجنة ونسيت أفتحه بعد ما خرجت"
- "تلاقيك قعدت تتصل لما شبعت"

أشار صديقهم الناحية الأخرى قائلا:

- "مش انا اللي اتصلت بيك يا كابتن.. ده خالك اللي قالب عليك الدنيا"

(يتبع )