advertisement

:: الحلقة العاشرة: "قابلوا مرعي"

في نفس اللحظة تقريبا.. ظهر توافق عجيب بين تصرفات الصديقين "فنكش" و "عمرو" قليلا ما يلاحظ..
جذب الأول "مرعي" ناحيته.. وجذب الثاني "عبده" بعيدا الناحية الأخرى.. كمحاولة عنيدة منهما لعدم وقوع شجار عنيف ربما لن تحمد عواقبه..

- "اتركني يا شادي.. دعني أتحدث مع هذا السافل.."

قالها "مرعي" وهو يحاول أن يتملص من ذراعي "فنكش" الذي طوقتاه بكل ما لدي صديقنا من قوة

- "صبرك بالله بس يا مرعي.. سيبه دلوقتي.. تعال بس معايا"

وجره فنكش جرا نحو ساحة أخرى مجاورة, بينما صيحات "عبده" الغاضبة تتعالى من ورائهما..

استأذن "فنكش" صديقا مرعي الذان يتبعانه كظله بأن ينفرد به لدقائق..
اطلت من عيونهم نظرة تستأذن "مرعي" بالذهبا فأشار لهم قبل أن يتلوا السلام منصرفين..

قال "فنكش" لزميله الثائر وهو يشير له بأن يجلس جوراه على مقعد قريب:

- " يا مرعي.. مش ده الأسلوب اللي تحل بيه المشكلة"

التفت اليه "مرعي" والغضب لا يزاله مكتنفه:

- " أمال ايه الأسلوب يا شادي.."
- "يا أخي أنا بشعر بالغيره على ديني.."
- "ولازم أقف موقف مع هذا الشخص الـ.."

قاطعه "فنكش" قبل أن يبدأ في نعت "عبده" مره أخرى بما يغضب:

- "بلاش نغلط في الراجل مره تانيه يا مرعي.. أرجوك"

تمتم "مرعي":

- "لو كان أحد الصالحين ما زال قيد الحياة لضرب عنقه.."

بادره "فنكش":

- "ازاي بقى يا مرعي.. يعني مش كان هاينصحه ويرشده؟؟؟.."
- "وبعدين يضرب عنقه ايه يا زميلي العزيز؟؟؟ هو أي حد يأذي أي حد؟؟؟".. "ده بخلاف ان اللي بتتكلم عنه مسلم زيي زيك.. مش كافر بنحاربه مثلا"

صمت "مرعي" للحظات قبل أن يقول:

- "ما احنا حاولنا نرشده يا شادي.. وانت شاهد.. لكن هو اللي ماعندوش استعداد يستجيب"

كان "فنكش" يحاول قدر المستطاع أن يهدئ من نفس "مرعي" ويجذبه نحو محادثه هادئة منطقية.. قال:

- "طيب مش يمكن ان الأسلوب نفسه هو اللي مش مناسب مع عبده؟؟؟"

انعقد حاجبا "مرعي" وحك لحيته قبل أن يتسائل:

- "ازاي يعني؟؟؟ مش فاهم؟؟؟"

ربت "فنكش" على ظهره وقال مبتسما:

- "بص يا مرعي.. انت ما تعرفش عبده.. ما تعرفش هو مين.. أهله مين.. ظروفه ايه.. وهو بيتصرف كده ليه؟؟؟"

بدا بعض الإهتمام على وجه "مرعي" ,و"فنكش" يتابع:

- "عبده ظروفه في البيت ملخبطه.. "
- "وده أثر جدا على تربيته.. وعلى خلفياته وثقافته.."
- "عبده ما يعرفش من الدين الا حاجات بسيطة قوي يا مرعي.."
- "يعني لما تيجي تتكلم معاه.. تخيل تماما انك بتتكلم مع واحد مثلا مش مسلم .. ولسه هاتعرض عليه يعني ايه اسلام مثلا.."

قال "مرعي":

- "يعني ما يعرفش الحلال والحرام يا شادي؟؟؟"
- "مايعرفش انه يتكلم عن بلده كده؟؟ يتكلم عن المسلمين كده؟؟"

ابتسم "فنكش" من جديد قبل أن يقول بهدوء:

- "لا مايعرفش يا عبده.. مسألة حلال وحرام أصلا عقله مش واخد عليها.."

وبدت عليه مسحة حزن قبل أن يضيف:

- "عبده حياته عبارة عن 3 حاجات.. البيت.. صاحبته.. الشركة اللي نفسه يشتغل فيها في أمريكا"
- "بجانب ان ستايله كله مرتبط بالغرب.. بيعشق حاجة اسمها أمريكا.. الميديا أكلت دماغه بحاجة اسمها أمريكا"

ونظر في عين "مرعي" مباشرة:

- " للأسف مفيش حاجة قدرت تربطه بمصر ولا بالمجتمع هنا.."

وتنهد بعمق قبل أن تعود ابتسامته من جديد ثم أضاف:

- "عموما ما تشغلش بالك بموضوع عبده.. سيبني أنا هقدر أتصرف معاه.."
- "عبده محتاج مشوار طويل جدا للإصلاح.. "
- "محتاج الواحد يعامله معاملة معينة.. ويدخل معاه من مدخل معين.."
- "عبده محتاج صديق يا مرعي.. مش محتاج العنف ابدا.. مش هاينفع معاه.."

وأشار بسبابته متابعا:

- "بالعكس, كده هانبعده أكتر ما هو بعيد"

وختم قوله:

- "سمعت عمرو خالد من كام يوم.. وكان بيقول ان احنا كمان لازم نكون رحمة للعالمين.. ولا إيه؟؟؟"

كاد "مرعي" يقول شيئا لكن رنين هاتف "فنكش" أسكته.. كانت رسالة "كلمني شكرا" كالمعتاد من "الروش"..

- "لحظة واحدة.."

هكذا قال "فنكش" لـ "مرعي" قبل أن يطلب "عمرو"..

- "إيه يابني؟؟ عبده فين دلوقتي؟؟؟"

أجابه "الروش" عبر الهاتف:

- "هو راح يحضر سكشن مع سلمى وبعدين هايروحوا على طول.."
- "انت اللي فين دلوقتي..؟؟؟"

أجاب صديقنا محاولا أن يختصر المكالمة:

- "أنا مع زميلنا مرعي.. خمسة كده وهاطلبك علشان نتقابل.. أوك؟؟؟"

أجاب "عمرو" أن :"أوك, وخلي بالك من نفسك..".. ثم أنهى المكالمة..

ابتسم "فنكش" مجددا - وحقيقة فإن ابتسامته دوما رائعة وجذابة وتجعل الآخرين يحبونه بشدة- قبل أن يقول لـ "مرعي":

- "المهم يا سيدي.. انت عامل ايه في المذاكرة.. انا عارف انك معانا في الدفعة"

ابتسم "مرعي" - بدوره- لأول مره مجيبا:

- "الحمد الله, بجيب امتياز كل سنة.. "

ارتفع حاجبا "فنكش" في دهشة قبل أن يشير مبتسما:

- "ماشاء الله.. يعني جاهز للامتحانات ؟؟.. ده أخوك مزنوق يا أستاذ.. كنت ناوي أذاكر النهاردة بس مفيش نصيب بقى.."

وأضاف متسائلا:

- "طيب.. ممكن تساعدني في مادة السلوك المؤسسي.. تقريبا مش فاهم فيها حاجة؟؟؟"

رحب "مرعي" بذلك عبر قوله:

- "طبعا ممكن أساعدك.. وممكن الأخوة زملائي يساعدوك.."

وعرض عليه أمرا بقوله:

- "وممكن كمان تطلع معانا رحلة الصيد.. احنا بنرتب لها علشان نحضر الإمتحانات بذهن صافي.."

وعقد حاجبيه كمن تذكر أمرا.. فقد ارتسمت ملامح جادة على وجهه وهو يشير لفنكش بسبابته قائلا:

- "لكن على شرط واحد.."


(يتبع )